這裏望正維港靚景，坐喺露天位置，吹住海風歎 brunch，閒情到爆。餐廳平日人均消費約 $400，但復活節半自助早午餐每位才$338，細路只需 $168，已可以任食超過廿款沙律、頭盤及甜品，如蘇格蘭煙三文魚、西班牙 cold cut、西班牙芝士等，最正是仲有無限量供應手切原隻 48 個月西班牙黑毛豬風乾火腿及 24 個月的特魯埃爾省白毛豬風乾火腿，平日起碼賣二百多元 100 克，單食火腿都夠回本，抵到笑！
主菜則四選一，包括美國特級安格斯西冷、煎澳洲羊架、西班牙鱈魚，必試招牌菜西班牙海鮮大鑊飯，由大廚即場烹調，用從西班牙訂來的三圈火爐，在直徑 80 厘米的大鐵鑊用西班牙 Bomba 米及熬足半日的海鮮湯來煮，加上西班牙紅蝦、魷魚、蜆、黑毛豬肉等，滿室香噴噴！
餐廳更將設小童玩樂區，請來小丑Bulu 與小朋友扭波搞氣氛，由姊妹店西班牙餐廳 ZURRIOLA 甜品總廚 John 擔任導師，指導小朋友為朱古力復活蛋畫上色彩繽紛的圖案，用的「顏料」是特別調製的朱古力漿，好玩又食得。
西班牙風乾 48 個月黑毛豬火腿
回本必食原隻西班牙風乾 48 個月黑毛豬火腿，即點即切，片片油潤甘香。
西班牙海鮮大鑊飯 (主菜、四選一)
由廚師即席烹調，飯粒索晒海鮮湯的鮮美，上面還有西班牙紅蝦、魷魚、蜆、黑毛豬肉等。
美國特級安格斯西冷 (主菜、四選一)
西冷本身肉味香濃，簡單的用鹽及胡椒調味已經很香，生熟度亦剛剛好。
煎澳洲羊架 (主菜、四選一)
羊架以低溫慢煮 1 小時再煎香，食落 juicy 又細嫩，配以芥末籽汁，味道很好。
西班牙鱈魚 (主菜、四選一)
用上西班牙北部的鱈魚煎香，口感嫩滑帶魚油香，加上西班牙水欖番茄汁，酸香味美。
迷你芝士餅
用上西班牙 Manchego 芝士來做，口感軟滑，芝士味濃。
復活節半自助早午餐
供應時間：4 月 19、20 日 12nn-3pm
價錢：成人$338、小童$168，設加一
TAPAGRIA
地址：尖沙咀彌敦道 100 號 The ONE 18 樓
電話：2147 0111
(原文摘自《U Magazine》文：Winsome、sieg、圖：kee、sky、kam、Pow、Emmy)
