40 年老字號均香餅家出品的角仔一向好評，今年更有新成員—— 開心果味角仔，消息一出引起全城關注，每日門外大排長龍，排 2、3 小時走唔甩，出爐十分鐘瞬間被清空，日賣 2,000 隻，瘋購程度超誇張！
text│Sakura photo│Kei
雖然是老餅店，但追上潮流，由均香第二代老闆江仔研發今次大熱的開心果味角仔，繼續秉承全手工製的宗旨，酥皮用低筋麵粉、日本砂糖和油製作，將水皮和油皮混合一起，摺足 12 層，做出來的角仔口感鬆化，酥層分明充滿層次。
餡料選用美國產開心果和意大利開心果醬製餡，經烘焗後的開心果放進磨機磨碎，特別有果仁香，再混合芝麻、砂糖一起攪拌，比傳統的角仔多了份果仁香脆感。
開心果角仔每日密密手不停包，皮與餡比例為 1:1，隻隻包到脹卜卜，做出咬下去先鬆化又脆的感覺，中心有滿滿的開心果餡，甜香又有果仁咬口，不會如坊間般皮多個餡，食到一口粉；用新鮮芥花籽油炸 15 分鐘，金黃鬆脆，超濃開心果味。開心果角仔每日限量供應，新年也不加價，當然想可能要有心理準備排隊了！
開心果角仔 $190 磅、$100 半磅（新年同價）
均香出品的角仔一向深受街坊歡迎，其金黃酥脆、口感鬆化，加埋即叫即炸，勁香口！
開心果餡外脆內香糯，餡多足料，充滿濃郁開心果味。
選用美國產開心果，再放進焗爐烘香，逼出開心果香氣。
揼本選用意大利開心果醬，味道濃郁。
均香餅家第二代老闆 江仔
年輕老闆自然多諗法，繼之前的朱古力味角仔，今次再追上潮流，研發開心果味角仔，出街至今由朝忙到晚，凌晨都未收工。
每隻都包得工整漂亮，謹記摺邊要埋口，炸時才不會漏餡。
角仔用 160-170℃ 油炸 15 分鐘，每隻都金黃脹卜卜。
開心果角仔每次一出爐 10 分鐘內就被買光，受歡迎程度都幾誇張。
均香餅家
地址：深水埗北河街 203 號地鋪
電話：2777 0719
營業時間：6:30am - 12mn
