愚人節2026｜愚人節玩笑｜又到4月1日愚人節！每年各大品牌也會傾盡創意鬥搞笑，今年也不例外，包括：IKEA芫茜豆腐新地筒配皮蛋味脆脆，譚仔、pizza hut 、KFC、永年、再睡5分鐘等，更有不少限定1日美食，大家不要錯過，大家一齊看看邊個的笑話最好笑啦～
愚人節｜1. 譚仔：還擊神器
愚人節又俾人當水魚整蠱？今年唔使再硬食苦笑啦！譚仔搞鬼推出愚人節限定「還擊神器」，一撳掣即有霸氣「譚仔姐姐」用招牌鄉音代你出頭還拖！面對朋友嘅假表白或無聊假圖，唔使自己嘥口水，姐姐親自出馬鬧醒佢：「等禾幫梨頂返兩句！」、「想玩我？有無_ _呀！」。
有譚仔姐姐「出山」霸氣幫拖，保證對方笑到投降，絕對是最強的防身武器！
只要去指定分店叫「經典麻辣湯配口水雞絲•石斑片•豆卷」，即送「還擊按鈕」一個。
指定分店https://shorturl.at/Fc3yD
愚人節｜2. Pizza Hut：意大利人集體震怒！全線Pizza強制加菠蘿
Mamma Mia！Pizza Hut 愚人節大搞「嗌菠蘿計畫」，誓要終結史上最大飲食界恩怨！平時食Pizza為咗加唔加菠蘿搞到面紅耳赤？今日去全線分店堂食，竟然享有「所有 Pizza 免費加菠蘿」嘅痴線優惠！官方明言「唔理你鍾唔鍾意，總之加咗先講」！一於趁今日帶埋身邊最憎食菠蘿嘅朋友去，迫佢食住菠蘿Pizza嚟個世紀大和解啦！
愚人節｜3. IKEA :芫荽豆腐味新地
IKEA每年愚人節都十分有創意，今年也不例外，今年推出芫荽味皮蛋新地配皮蛋脆脆，芫荽控記得去！
愚人節｜4. 大快活 : 快活GYM ROOM
阿活喺度大聲宣布「快活GYM ROOM」正式開幕！
愚人節｜5. 屈臣氏 : Watsons Hotel 豪華設施
愚人節｜6. 再睡5分鐘：厚達10cm的奶蓋
「再睡5分鐘」4月1日突發推出一日限定的「棉胎午茉綠」！平時3cm厚奶蓋未夠邪惡？今次老闆失控加厚到足足10cm，真係「飲奶蓋多過飲茶」，名副其實成張「棉胎」冚落去！呢杯專為奶蓋狂熱份子而設愚人節玩大咗！特飲盛惠$41，全線門市同步發售。記住甜度冰塊「死咕咕」無得改、亦無得加配料，限量發售，售完即止！各位奶蓋控，聽日準備好去挑戰「飲棉胎」未呀？
棉胎午茉綠
愚人節限定價：HK$41
販售日期： 4月1日（一日限定）
全港再睡5分鐘門市同步供應
愚人節｜7. KFC : 唔賣雞改賣「極鬆軟攬枕」？
KFC 正式宣佈不務正業，進軍家居市場推出「極鬆軟攬枕」！標榜 100% 天然物料，高回彈質地為你提供支撐性同安全感，好似俾嚿炸雞攬住咁溫馨。雖然攬枕「不日上市」，但其實係想宣傳強勢回歸嘅「肯！鬆甜包系列」，升級配方鬆軟度 UPPP，仲有全新雞肉蛋口味。想搶先體驗鬆軟感？食咗個包先啦！
愚人節｜8. 彬玉 :傳說級配菜！「三色豆茶碗蒸」登場
杉玉為咗慶祝復活節，居然搵嚟地獄級食材「三色豆」坐鎮，推出限定【三色豆茶碗蒸】（$28）！翠綠青豆、金黃粟米加紅蘿蔔，色彩斑斕到帶來視覺衝擊。雖然官方最後叫大家「冷靜啲」，證實係虛構產品，但咁「有層次」嘅視覺享受，真係想 Tag 位最憎食三色豆嘅朋友去感受吓份「口福」！
愚人節｜9. 大家樂：$12大雞髀 ! 脆炸雞髀/豉油皇雞髀 附開賣時間
香港人最愛食下午茶，咬住隻大雞髀歎杯凍檸茶絕對係男人的浪漫、OL的恩物！適逢愚人節，大家樂 (Café de Coral) 突發為全港市民送上極大驚喜，明言今次「冇玩嘢！Can cheaper 髀你」，一連兩日推出極度震撼的 $12 買超大雞髀優惠！
大家樂優惠 ｜$12 歎原價 $25 大雞髀
平時去快餐店單叫一隻雞髀閒閒地都要$25，今次大家樂真係大出血！於指定兩日，大家可以破底價 $12，就可以外賣帶走一隻原價 $25 的大雞髀，折扣高達半價，性價比極高，完全係糧尾恩物！
▼即睇「大家樂雞髀優惠」時段及詳情▼
雙重邪惡選擇！脆炸 vs 豉油皇
優惠雖然平，但款式絕對唔馬虎！大家樂貼心地提供兩款經典人氣口味任君選擇：
脆炸雞髀： 外層金黃酥脆，內裡嫩滑多汁，每一口都炸出酥脆聲響
豉油皇雞髀： 秘製滷水豉油完美滲透雞肉，肉質嫩滑入味，送飯或單食都咁正！
大家樂「$12 大雞髀」優惠詳情
想成功搶到半價大雞髀？記得 Mark 實以下重點，唔好摸門釘呀：
- 優惠日期： 3 月 31 日 至 4 月 1 日（一連兩日限定！）
- 供應時間： 下午 2 時半起（售完即止）
- 優惠內容： $12 購買脆炸雞髀 或 豉油皇雞髀 一隻（原價 $25）
- 購買限制： 只限外賣
- 適用地點： 全線大家樂（實際供應視乎個別分店而定，詳情請參閱店內宣傳品）
愚人節｜10. 永年：維持年輕嘅秘密？竟然係「豬腸」！
永年士多驚爆首發「豬腸膠原蛋白啫喱」！號稱採用 No.1 獨家豬腸配方，研發出 99% 破腸技術，等你可以無阻力吸收豬腸精華。標榜「維持年輕嘅秘密就係咁簡單」，將彈潤成分完全釋放。雖然聽落好似飲緊熱辣辣嘅豬腸湯咁，但為咗變靚，你又敢唔敢試吓呢份「重口味」嘅膠原蛋白？
愚人節｜11. Wingman：重口味極致！「爸爸的臭襪」味雞翼
Wingman 今年真係玩到癲，竟然破天荒推出史上最「有味道」嘅新口味——「爸爸的臭襪」！聞落極度懷疑人生（阿媽會問邊個無洗襪？），但其實係「極濃郁芝士＋蒜香爆擊」嘅超邪惡組合，越食越上癮！呢款「臭味相投」雞翼只限今日於中環分店快閃供應。強烈建議買去請朋友食，但千萬唔好話畀佢知係咩味，保證有驚（嚇）喜！
愚人節｜12.壽桃：全港首創「粥」昇麵！老細拍板「亂嚟」？
壽桃小編直言自己平時鍾意將炒麵浸落粥度食，點知老細聽完居然話「有得做」！結果就誕生咗這款鮑魚雞粥配竹昇麵。幼滑鮑魚雞粥底加上爽身彈牙嘅麵條，鹹甜交織（咦？），小編自己都話想像唔到溝埋會係咩樣。各位澱粉質狂熱分子，準備好挑戰呢碗由老細親自拍板嘅「跨界」巨作未？
愚人節｜13.吃茶三千 : 奶茶杯盲盒
「吃茶三千」4月1至2日搞鬼推出「奶茶杯盲盒」！
玩法超簡單：只要買杯飲品，Follow佢哋IG或小紅書，再跌多$5大洋，即換神秘盲盒一個！入面裝住全靠彩數的「隨機驚喜優惠券」！
究竟抽中嘅係幫你慳荷包嘅神級折扣，定係得啖笑嘅愚人節小禮物？自認抽獎運極佳嘅奶茶控，快啲去用$5博一鋪單車變摩托啦！
4/1-4/2購買飲品＋追蹤IG/小紅書＋$5換購盲盒，隨機獲得驚喜優惠券
愚人節｜14. Justformochi : 芫荽皮蛋大福
Justformochi小正大福推出芫荽皮蛋大福，呢個奇怪口味會快閃一星期！有興趣試伏嘅朋友記得試下啦~
地址：尖沙咀K11 Art Mall B2
中環街市1樓109號
啟德Airside B1/F
資料來源：Justformochi、 吃茶三千、再睡5分鐘、大家樂
愚人節2025
大家看完今年各大品牌愚人節是否未足夠呢？小編再分享上年各大品牌愚人節的創意，一齊放鬆下～
愚人節｜1. IKEA：咖喱朱古力新地筒配脆米
愚人節創意之王IKEA！今年愚人節小編找數，影片有一隻手和啡色的雪糕，帖文更表示「真男人！數已找！！！！_已吃！ 原來食落有陣咖喱味！少少回甘! 濕潤感十足！微微脆口！一C難忘！#真食#珍食#非愚人節。」
同時IKEA宣布推出「咖喱朱古力新地筒配脆米」，大家有沒有勇氣大膽一試！
愚人節｜2. Pizza Hut：菠蘿Pizza
今年愚人節Pizza Hut 特意研發並推出菠蘿世一批，並以趣致菠蘿造型吸引眼球，批底上鋪滿增量菠蘿及煙肉粒，配合醒胃惹味的全新菠蘿沙律醬配方，絕對是中午辦公室聚餐或晚上親友聚會的開胃「打卡」首選!
此外，Pizza Hut更快閃多區免費派發1人餐及菠蘿pizza ，有興趣的朋友可以按下圖睇詳情喇！
愚人節｜3. 壽司郎：天婦羅雪糕
壽司郎宣布推出新甜品南瓜天婦羅抹茶蕨餅芭菲，更形容當甜甜南瓜天婦羅配上軟滑嘅牛奶味軟雪糕再淋上甜醬油之後會帶嚟意想不到「焦糖」般的味覺，勢估唔到成個組合居然可以咁夾！不過帖文最底表示「今日係4月1日愚人節〜祝大家愚人節快樂！南瓜天婦羅抹茶蕨餅芭菲丷其實全屬虛構咋~現時舖頭係不設販售㗎！希望睇到呢度嘅朋友仔唔好嬲啦！」
同步推出柚子鹽味飲品新登場！4月1日（二）起有得飲！香甜葡萄柚配上微鹹鹽味塑造海邊渡假嘅輕鬆感覺~享受清爽口感之餘，品嚐微鹹鹽味同葡萄柚香甜的精妙。最後，壽司郎表示「以為愚人節就咩都係假？？唔係啊！我係真」，大家又信唔信？
愚人節｜4. 港鐵：shake shake粉
今年愚人節連運輸業都加入戰團？港鐵今年就闖入飲食界，推出秘製鐵味shake shake粉，總共有4款口味，有鐵路粉、高鐵粉、綠鐵粉、機鐵粉，一齊嚟 shake shake 啦!
愚人節｜5. KFC：榴槤味香水
上年愚人節買D24榴槤葡撻送榴槤味洗衣珠，今年繼續以 KFC 招牌 D24 榴槤葡撻為靈感，推出一項破格的榴槤新品「榴槤忘返香水」，隨時隨地噴在身上，令到滿身都充滿榴槤香氣，將「果王」的濃郁香氣完美封存，榴槤控不要錯過！有興趣的朋友可以按下圖睇領取榴槤味香水方法喇！
愚人節｜6. 譚仔三哥：全線「走辣」
三哥最出名除了米線外，辣都非常出名，不過愚人節宣布全線「走辣」，相信對熱愛辣的朋友是一個壞消息。
大家都不要失望，三哥同時宣布玩遊戲即免費送小食，想知就click入下圖看帖文內容。
愚人節｜7. 意樂：蛋黃煙肉卡邦尼長通粉薯片
意樂竟然踩過界進軍零售界？首次推出「蛋黃煙肉卡邦尼長通粉薯片」！將經典意大利菜的靈魂化作一片片香脆可口嘅薯片。
愚人節｜8. Chicken Factory：百里香烤雞口味沐浴露
又多一間餐飲業踩過界進軍沐浴露，Chicken Factory宣布全新推出百里香烤雞口味沐浴露！官方更表示沖完涼，洗完有滑嫩嫩嘅肌膚，唔單止清新又滋潤，更可以即刻回憶起香噴噴的烤雞味道~不過細心留意最後一句「重要聲明：愚人節限定，笑下就好，唔好以為有得買啊。」
愚人節｜9. RUD 燒肉：燒肉味嗽口水
Rud Yakiniku宣布燒肉味嗽口水登場！將燒肉香味完美還原，山毛欅木煙燻厚切豚腩肉味嗽口水用燒肉靈感打造，濃濃的煙燻香氣配埋清甜菠蘿蓉味道，酸酸甜甜，漱口都好似度進食燒肉中，口腔一樣有「燒肉體驗」！最後，表示不日推出，記得同朋友講聲「愚人節快樂」！
愚人節｜10. NabeGo：國王湯底
NabeGo 宣布一日限定的國王湯底，餐廳重金禮聘兩位穩世師傅，閉門研發極簡之作—「國王的湯底」！將極簡、純粹理念融入【國王的湯底】中，以全透明湯底呈現極簡之美。廚師亦解釋，湯底採用冷泡茶之過濾純淨水。湯底呈現晶瑩剔透的外觀，低卡路里之餘、亦O糖、0脂肪，是追求健康人士的理想選擇。今次湯底陣容亦不容忽視，只要顧客惠顧任何套餐並加$9，即可升級為「國王的湯底」，湯底更額外奉送極上拼盤（細），絕對不容錯過。
愚人節｜11. 牛奶冰室：雪糕車
牛奶冰室宣布有雪糕車，車上更可歎到北海道牛乳軟雪糕，更表示特濃8.0牛乳，香甜又滑溜，奶味濃郁，入口即化。
愚人節｜12. 牛角：和牛雪條
近年非常流行盲盒，牛角宣佈全線牛角Buffet雪糕櫃「神秘盲盒登場」，同時宣布推出「極上神・仙和牛雪條」，更提及燒肉tips！
燒肉Tips：
1. 特別加入牛胸油，燒肉的香氣可能令你 「飄飄然」（但100%純和牛，絕對安全！）
2. 每面燒 2分15秒（牛角職人實測，此時間能觸發 「和牛鮮味大爆發」）
3. 因油脂 「過分輕盈」，雪條會懸浮爐上約 3cm，建議用燒肉鉗穩住，以免 「升空」！
愚人節｜13. 堅信號：生煎包味袪濕貼
今年愚人節不少品牌都踩過界，堅信號宣布最近天氣有啲潮濕，搞到大家都好易攰，有見及此推出期間限定產品生煎包味袪濕貼，功效有助水腫、疲勞和毒素全部byebye。同時帖文最後Hashtag表示「#堅信號 #堅信號上海生煎皇 #愚人節快樂 #係唔係真係想要 #小編都想要 #真係出就好啦」
愚人節｜14. 香港航空 ：港航烘焙
香港航空全新推出港航烘焙店於4月1日開幕！香港航空於中環開設麵包店「港航烘焙」，並將機上名物餐包帶到陸地市區，如港式菠蘿叉燒包、港式午餐肉包、紅豆包等均有售。更為慶祝新店開張，首 41 名顧客買包送機票，今個愚人節優惠真係激抵啊！
愚人節｜15. 雀巢：芫茜雪糕
芫茜派注意！雀巢推出芫茜味雪糕，將口感昇華！不過最後帖文表示「haha!! 愚人節快樂！喺芫茜味未出之前，食住啲Original啲嘅口味先喇」。
愚人節｜16. Mosburger：雙層「愚」柳漢堡
MOS BURGER 都有新搞作？3條美人魚等身大、長度超過5米嘅巨大魚柳，再配埋士多啤梨他他醬，好似幾正。以上5米摩斯巨大魚柳包將於全線分店推出，發售日期就研究緊 。
大家愚人節快樂 ！不過今日Mosbuger真係有一日優惠送比大家！限定加$10 升級雙層「愚」魚柳包再次登場 🎉
愚人節｜17. 譚仔：譚仔姐姐痛袋
譚仔宣布推出「譚仔姐姐痛袋」，隨時隨地可以帶譚仔姐姐出街。帖文更表示「如果個Post過1000個likes，再留言讚下小編，就諗下割愛送畀其中一個粉絲啦！」。
愚人節｜18. 元気：首推盲盒壽司
元気盲盒壽司一律$12。
愚人節｜19. Indomie：營多珍珠奶茶
營多撈麵決定進軍手搖市場，營多珍珠奶茶。
愚人節｜20. 屈臣氏 ：茶餐廳
屈臣氏要開第一間茶餐廳啦！
資料來源：Pizza Hut 、壽司郎、港鐵、KFC、譚仔三哥、意樂、Chicken Factory、RUD 燒肉、NabeGo、牛奶冰室、牛角、堅信號、IKEA、香港航空、雀巢、譚仔、Mosburger
